試下整糕 後篇- 再戰蘿蔔糕馬蹄糕篇

上次講到蘿蔔糕第一試，以「散哂」作結，今次繼續講。

蘿蔔糕第二試，改用全圓邊「無Deep V」的「重裝大鍋」去蒸。撈粉方式改為「熱鍋蘿蔔全落料漸加漿」的包保煮熟的方法。先把炒過的臘味料和一部份粉漿加入熱鍋上的蘿蔔絲，一路加粉漿一路攪，直到全部粉漿倒入，再攪一陣，糕的顏色變深，卒之發覺倒唔出，改用木匙剷過去糕盤，再細心撥平表面，蒸一小時成形。開蓋時有極佳臘味香氣出現，只是顏色較深。

試煎，切片無問題，煎好雖然仍有煎散的毛病，但入口臘味香濃，蘿蔔味也足夠。算有69分喇。

決戰馬蹄糕

材料自批皮馬蹄，要蒸好，個人喜歡較爽較硬身的馬蹄肉。馬蹄粉$50一盒，超市有售，粉和水比例是1：4。再用「熱鍋手攪粉漿」方法，一路攪一路觀察，會看到粉漿開始有一絲絲的糕絲出現，加馬蹄肉，留意糕絲情況，可以倒入糕盤，如果驚唔熟就煮耐少少，糕絲會大量出現，甚至全底糕會半成形，此時是最後倒入糕盤的機會。蒸25分鐘。又算成功。

其實整糕是一個結合物理和化學的實驗，以前做實驗要好小心，方法不當就糟糕了。而整糕就是我做實驗的延續，整糕失敗，才是真正的糟糕！哈哈！

祝大家龍馬精神！步步高陞！甜甜蜜蜜！馬到功成！身體健康！